سرکاری افسران کی دوہری شہریت سے متعلق از خود نوٹس کا فیصلہ محفوظ

24 ستمبر 2018

sarkari afsaraan ki dohri shehriat se mutaliq az khud notice ka faisla mehfooz

اسلام آباد: سپریم کورٹ میں سرکاری افسران کی دوہری شہریت سے متعلق از خود نوٹس کیس کا فیصلہ محفوظ کرلیا۔

سپریم کورٹ میں چیف جسٹس پاکستان Pakistan کی سربراہی میں ججز اور سرکاری افسروں کی دوہری شہریت سے متعلق ازخود نوٹس کی سماعت ہوئی۔

سماعت کے آغاز میں چیف جسٹس پاکستان Pakistan جسٹس ثاقب نثار نے کہاکہ عدالتی معاونین اور فریقین کو تفصیل سے سن چکے ہیں، ایک کٹیگری ان لوگوں کی ہے جو پیدا ہی بیرون ملک ہوئے، دوسری کٹیگری ان کی ہے جو تعلیم حاصل کرنے گئے اور وہاں شہریت لی جب کہ تیسری کٹیگری ان کی ہے جنہوں نے دوران سرکاری ملازمت دیگر ممالک کی شہریت لی۔

چیف جسٹس پاکستان Pakistan نے استفسارکیا کہ کیا تینوں کٹیگریز کے ساتھ سلوک یکساں ہونا چاہیے؟

عدالتی معاون شاہد حامد نے عدالت کوبتایا کہ غیر ملکی شہریت کا مقصد نقل و حرکت میں آسانی ہے، بعض لوگ اپنے بچوں کو غیر ملکی شہریت دلواتے ہیں، حکومت کو سیکیورٹی مسائل مد نظر رکھ کر فیصلہ کرنا ہو گا۔

عدالتی معاون کا کہنا تھا کہ سرکاری اداروں میں دوہری شہریت کے حامل افسر نہیں ہونے چاہئیں، بہتر ہو گا عدالت حکومت اور پارلیمنٹ کو فیصلہ کرنے دے، آج تک کسی پاکستانی کی شہریت منسوخ نہیں ہوئی، لاہور ہائی کورٹ نے نادرا کو شہریت منسوخی سے روکا تھا۔

اس موقع پر جسٹس عمر عطا بندیال نے ریمارکس دیئے کہ بعض عہدوں پر ملک سے مکمل وفاداری لازمی ہے، ڈاکٹرز اور اساتذہ کی دوہری شہریت میں قباحت نہیں۔

چیف جسٹس نے کہا کہ ملک کو دھوکا دےکر بیرون ملک جائیدادیں بنانے والے آج بھی عہدوں پر ہیں، سرکاری افسران باہر جاکر چھٹیاں لیتے رہے اور فارغ ہونے پر عدالت چلے گئے، ایک ڈی آئی جی نے کینیڈا کی خاتون سے شادی کی، بظاہر ڈی آئی جی کے بچوں کی حوالگی کا مسئلہ عدالت میں آیا، دراصل جھگڑا کینیڈا کے پیسے سے بنے گھر کا تھا۔

جسٹس ثاقب نثار نے ریمارکس دیئے کہ ملک کی بدنامی کا باعث بننے والوں کےساتھ رعایت نہیں ہونی چاہیے، پالیسی بنانے کا اختیار حکومت کو ہے، جسٹس اعجاز الاحسن نے کہا کہ ایک ساتھ دو کشتیوں میں سوار نہیں ہوا جاسکتا۔

چیف جسٹس نے ریمارکس دیئے کہ اراکین پارلیمنٹ کے لیے دوہری شہریت پر پابندی ہے تو بیوروکریٹس پر کیوں نہیں؟سرکاری افسران کی دوہری شہریت پر حکومت کو سفارشات دیں گے اور اہم عہدوں پر دوہری شہریت کے حامل افراد سے متعلق تحفظات کا اظہار بھی کریں گے۔

عدالت نے فریقین کے دلائل مکمل ہونے کے بعد کیس کا فیصلہ محفوظ کرلیا۔

 58